Հայաստանի Հանրապետության տարածքում դպրոցական և նախադպրոցական ուսումնական հաստատությունների սանիտարական հանգույցների իրավիճակի բարելավման շրջանակում արդեն տարբեր չափորոշիչներով կլաստերացված կրթական հաստատությունների համար առաջարկվել են պատրաստի ունիվերսալ հետևյալ լուծումները։ Վերջին երեք տասնամյակների ընթացքում չվերակառուցված և սեյսմիկ առումով խոցելի շենքերի դեպքում առաջարկվում է կիրառել ժամանակավոր շարժական մոդել։
Շարժական մոդելի տրամաբանությունը ենթադրում է 6մ x 2.4մ արտաքին չափերով կոնտեյներներից բաղկացած արտաքին առանձին կանգնած շինություն։ Մինչև 60 աշակերտ կամ երեխա ունեցող կրթական հաստատություններում տեղադրվում է մեկ կոնտեյներ՝ մեկական արական և իգական զուգարանակոնքով ու լվացարանով և մեկ հաշմանդամների և մեծահասակների համար հարմարեցված սենքով։ 60 աշակերտից կամ երեխայից ավել, մինչև 210 աշակերտ ունեցող կրթական հաստատություններում առաջարկվում է կցել երկրորդ կոնտեյները, որտեղ ևս երկուական արական և իգական զուգարանակոնքով ու լվացարանով սենքեր կարող է տեղադրվել։ Այն կարող է տեղադրվել հողի նիշից բարձրացված (հողի նիշից 45 սմ) կամ հողի նիշով՝ կախված առկա տեղադիրքից (ռելիեֆից) և գրունտների որակից։
Տանիքին նախատեսվում է տեղադրել արևային էլեկտրական մարտկոցներ։ Նախատեսված է նաև տեխնիկական սենյակ, որտեղ նախատեսվում է տեղադրել լվացարանների օգտագործված ջրերի վերօգտագործման համար նախատեսված ջրի բաք, մաքուր ջրի բաք, ջրմուղ պոմպեր, էլեկտրական տաքացուցիչներ և այլ տեխնիկական սարքեր։
Առաջարկվող մոդելը հարմարեցված են հաշմանդամություն ունեցող անձանց համար։ Յուրաքանչյուր մոդել անկախ նորմավորված նստատեղերի քանակից ունի առանձնացված հաշմանդամություն ունեցող անձանց համար հարմարեցված սենք։ Հաշվի առնելով, որ կրթական հաստատություններում մեծահասակների՝ ուսուցիչների, դաստիարակների, վարչական և տեխնիկական աշխատակիցների, ծնողների համար սանիտարական հանգույցի առանձնացված սենքեր են անհրաժեշտ, ապա առաջարկվում է հաշմանդամների համար առանձնացված սենքը դիտարկել որպես մեծահասակների առանձնացված սենք։
